رئيس الحزب اللبناني الواعد فارس فتوحي :أعجبنا كثيرا بكلمة النائب سامي الجميّل في جلسة مناقشة الموازنة، لِما فيها من حسّ وطني، وبالأخص مع المكوّن الشيعي، حيث دعاهم للإعتماد على اللبنانيين فقط، والاعتماد على الدولة ويجرّبوها.
صحيح حزب الله بيقول إنّه جرّب الدولة من الـ1948، وما مشي الحال، وظلّت القرى الجنوبية بخطر. هذا الكلام صحيح، ولكن من بعد ما دخلت المقاومة الفلسطينية بسنة الـ1969 صار هيدا التحليل بدّه تدقيق.
أنا بدي إحكي من منطلق تاني، بدي إحكي عن تجربة الدولة بهالسنة اللي قطعت. تجربة الدولة وللأسف ما عطت أي نتيجة، بمعنى إنّه مش بس بحماية الجنوب. يمكن الجيش اللبناني ما رح يقدر يكون أقوى من إسرائيل، ولا بيوم من الأيام، ولكن الدبلوماسية والدولة كان واجبها تعمل انسحاب إسرائيلي من النقاط الخمسة، وتعمل وقف للقصف، وتعمل استرداد للأسرى، وتبدأ بمشروع إعادة الإعمار، وهالشي كلو ما صار لحدّ الساعة.
مشان هيك ممكن هالخطاب، هالكلمة، تكون مؤثّرة بالمعيار العاطفي، أمّا بالمعيار السياسي فبنقصها كتير من الدقّة. ما فينا مع ناس حاسة حالها مستهدفة نحكيهن بالعواطف… جيبولن ضمانات ليصدقوقن…نفذوا وعودكم ليرتاحوا شوي… لازم الأميركيين يضغطوا على إسرائيل ويقدّموا شي للدبلوماسية اللبنانية، وإلّا كل هالكلام رح يبقى كلام بالهوا.
