رسالة الرئيس عون إلى اللبنانيين في الذكرى الخمسين ل “١٣ نيسان “:
إخوتي اللبنانيات واللبنانيين …
حبّيت اليوم بالذات … وجّه إلكن هالرسالة …
بصراحة وبشكل مباشر … عشية 13 نيسان …
عشية 50 سنة … على هالذكرى المشؤومة …
50 سنة …
يعني اللي خِلقو يومها … اليوم صاروا مقضيين أكتر من نص عمرن … بالقلق والخوف وعدم الاستقرار …
واللي كانوا ناطرين يومها، يختاروا لأول مرة… مين يمثلُن، بانتخابات سنة ال 76 …
صاروا اليوم فوق السبعين من عمرن …
ويمكن بعد ما اختاروا ولا مرّة كيف بدّن لبنان …
خمسين سنة … جيلَين كاملين … ضاعت إيامن وأحلامن وكل عمرن … وبعد ما خلص الضَياع …
والأهم بهالذكرى نتذكر آلاف اللي ماتوا … من كل لبنان … وبكل لبنان …
وآلاف اللي بعدها جروحاتن شاهدة …
وآلاف العائلات اللي بعدو جرحها مفتوح … مع المفقودين اللي هنّي وأهاليهن، ضحايا الحرب الدايمين …
آن الأوان نتعلّم، إنو شو ما كانت كلفة التسوية الداخلية بيناتنا …
بتضل أوفر بكتير علينا كلنا وعلى لبنان … من أي ثمن مندفعوا للخارج …
الدرس التالت … إنو كلنا في لبنان … ما إلنا إلا الدولة اللبنانية …
على مدى 50 سنة من الحرب ومية سنة من لبنان الكبير …
تأكدنا كلنا … إنو لا الأفكار اللي أصغر من لبنان، إلها مطرح بالواقع اللبناني …
ولا الأوهام اللي أكبر من لبنان، قدّمت أي خير لأهلنا ووطننا …
لهيك أعلنا كلنا إيماننا بلبنان وطن نهائي إلنا كلنا …
ولما نقول ما إلنا إلا الدولة اللبنانية … يعني ما إلنا إلا مؤسسات الدولة … ويعني ما إلنا إلا بعضنا …
حتى نكون كلنا سوا … متساويين … حتى لو كنا مختلفين …
لا حدا منا خايف … ولا حدا بِخوّف …
لا حدا منا ظالم … ولا حدا مظلوم …
لا حدا منا غابِن … ولا حدا مغبون …
وكلنا، متل ما بضل بقول وبكرّر … تحت علم واحد … ومنحمل هوية وحدة …
أنا جايي قول لكل إخوتي اللبنانيي … واجب علينا نكون تعلّمنا من هالخمسين سنة …
أول درس تعلّمناه … هوي إنو العنف والحقد ما بحلّوا أي مشكلة بلبنان …
وإنو حوارنا قادر يحقق كل الحلول، لكل مشاكلنا الداخلية والنظامية …
لإنو هيدا وطن عندو ثوابت … وأول ثابتة في لبنان، إنّو ما حدا بيلغي حدا بهالبلد …
الدرس التاني، إنو كلما حدا منا استقوى بخارج ما، ضد شريكو بالوطن …
خِسر هوي… وخِسر شريكو وخِسر الوطن …
وكلنا وقعنا بهيدي الغلطة … وكلنا دفعنا الثمن … وآن الأوان نتعلم من أغلاطنا …
